Puya gisulod og garapon 'patiran sa nanagtabanog

Mga bata nga nagpalupad og tabanog nakapatid og puya nga gisulod og garapon ug gituohang gituyo paglabay sa wala pa mailhing inahan.

Kini nakaplagan alas 2 pasado sa miaging hapon sa dalan Duterte, Sabang, Danao.

Si SPO4 Teofilo Deguilmo sa Danao Police Station nga gikahinabi sa Banat News miingon nga dili na mailhan kon babaye ba o lalaki tungod kay nagsugod na man og kadugta ang puya.

Matud pa ni SPO4 Deguilmo nga nalingaw unta kaayo ang mga bata og dagandagan sa maong dapit sanglit nagpaaway man kini sa gipalupad nilang tabanog.

Dugang pa niya nga natingala ang mga bata sa ilang napatiran nga may-ong man sa usa ka bata nga gisulod og garapon.

Si SPO4 Deguilmo, miingon nga ilang gihimo karon ang pagsusi sa mga silingan aron masuta kun kinsa ang babaye nga nagsabak ug kalit lang nigamay ang tiyan apan walay nakamatikod nga nanganak.

Ang puya gidala sa Municipal Health Office sa Danao.