Pinanser sa masiao 'sikop

Gidudahang financier sa sugal nga masiao diha sa habagatang bahin ning lalawigan sa Sugbo nadakpan sa ronda sa kapolisan nga gilusad sa Provincial Police Office niadtong Lunes sa buntag.

Gidudahang financier sa sugal nga masiao diha sa habagatang bahin ning lalawigan sa Sugbo nadakpan sa ronda sa kapolisan nga gilusad sa Provincial Police Office niadtong Lunes sa buntag.

Ang nadakpan giilang si Angel Felicis, 41, molupyo sa Poblacion, Boljoon pinasikad sa search warrant nga gipagawas ni RTC Argao Judge Maximo Perez.

Ang grupo sa Provincial Investigation and Intelligence Branch pinanguluhan ni Sr. Inspector Wilfredo Pulvera uban sa mga sakop usab sa Boljoon police mironda sa panimalay ni Felicis human makadawat og impormasyon kabahin sa presensya niini.

Nasakmit sa maong operasyon ang mga remittance slip nga nagkantidad og P50,000 cash nga P8,095 nga gituohang kinitaan sa masiao ug ingon man mga gamit alang sa pagbola sa maong sugal.

Matud pa ni Pulvera nga idlas kaayo ang suspek sanglit lima ka mga lungsod ang operasyon ni Felicis, kini mao ang mga lungsod sa Alcoy, Boljoon, Dalaguete, Oslob ug Santander.

Gumikan sa kalapad sa dapit sa operasyon niini makadaghang higayon na usab kini nakaikyas sa mga polis nga nangita kaniya.

Ang kadagkuan sa PNP mimando sa pagpapas sa tanang matang sa iligal nga sugal sa nasud nga mao karon ang giingong gipangwartahan sa ubang mga politiko ug bisan na gani sa pipila ka mga sakop sa hiwing kapolisan.

Si PNP director Arturo Lomibao mipatuman sa "three strike policy" sa tibuok nasud diin taktakon sa pwesto ug imbestigahon ang bisan kinsang opisyal nga mapakyas sa ilang kampanya batok sa iligal nga sugal.