Gradwadong street-children gipahalipayan

Gipasidunggan ang tanang mga street children kun libod suroy nga mga bata nga naka-gradwar sa ilang pagtungha sa elementarya, sekundarya ug kolehiyo karong tuiga human gisagop ug gipatungha sa kagamhanan sa dakbayan sa Sugbo.

Kini pinaagi sa programa nga gitukod sa kagamhanan sa dakbayan sa Sugbo, ang Cebu City Task Force on Street Children nga ubos sa pagdumala ni Cebu City first lady Margot Osmeña.

Atol sa recognition sa mga street children nga naka-gradwar karung tuiga gipahalipayan ni Osmeña ang maong mga kabataan dungan ang pagpadayag niini sa iyang tumang kalipay tungod sa positibong resulta sa mga paningkamot nga gihimo aron matabangan ang mga kabataan nga kaniadto naglatagaw lang diha sa kadalanan.

Karong tuiga dunay mga mi-gradwar niini nga nakahipos og mga medalya sama sa 21 anyos nga si Flora May Pulgar ug Juvinal Taboada nga mga cum laude ug gigastuhan sa Lihok Pilipina Foundation.

Samtang sa high school mi-gradwar usab nga valedictorian si Rene Boy Lebores ug Jovie Montillano nga gi-abagan sa Share a Child Movement ug Dangpanan Children's Center sa ilang pagtungha.

Nahimong 1st honorable mention si Jeffrey Eduaba sa Share a Child movement, 4th honorable mention si Welfe Cualbar sa ACG Foundation ug 10th honorable mention si Aidalyne Basallo sa ACG Foundation.

Sa elementarya migradwar nga first honor si Allet Mary Teves sa Nazareth Children's Center ug third honor si Jessa Baguio sa Nazareth Children's Center.

Nasayran nga dunay 21 ka mga accredited foundation dinhi sa dakbayan nga gi-tap sa dakbayan aron motabang og gasto aron makatungha ang mga bata nga anaa karon sa Pari-an drop in center.