Suspendidong mga opisyal sa ABC balik na's pwesto

Miasumir na og balik sugod kagahapong adlawa sila si Association of Barangay Council (ABC) President Eugenio Faelnar ug tanang mga sakop sa board nga gisuspenso sa Sandiganbayan.

Kini human gipatuman ni Mayor Tomas Osmeña ang giluwatang direktiba sa Sandiganbayan Fourth Division nga nagmando sa mayor nga putlon una ang 90 days suspension order batok nila ni Faelnar ug mga kaubanan.

Kini tungod sa wala pa maresolbar nga motion for reconsideration nga giduso nila ni Faelnar ug ABC Vice President Sesinio Andales ug mga kaubanan nga nag-kwestiyon sa preliminary investigation sa kaso.

Sayo niini, si Osmeña nangayo og katin-awan sa Sandiganbayan kun duna bay katungod ang iyang buhatan nga mopatuman sa maong suspension order ug ingon man duna bay legal nga basihanan ang maong katungod.

Ang giluwatang direktiba niadtong petsa 22 sa Marso sa Sandiganbayan pirmado kini nila ni Associate Justice Gregory Ong, Jose Hernandez ug Rodolfo Ponferrada.

Gikonpirmar usab ni City Administrator Francisco Fernandez ang maong nadawat nilang direktiba sa Sandiganbayan nga nagmando nga makabalik isip opisyal sa ABC ingon man sa ilang tagsatagsa ka mga posisyon sa barangay sila si Faelnar, Andales ug mga kaubanang kapitan nga sakop sa board sa ABC.

Nasayran nga gipatuman ni Osmeña ang suspension order batok sa maong mga opisyal sa liga sa unang semana sa Marso gumikan sa giluwatang preventive suspension sa Sandiganbayan kabahin sa kasong gipasaka batok sa kanhi project engineer sa ABC Engr. Leah Rondez nga nangayo og disbursement nga P4,300 sa iyang gasoline allowance.