Di angay mag-beach ron

Sipa kaayo ang awhag ni Msgr. Achiles Dakay, tigpamaba sa archdiocese sa Cebu nga dili angay moadto sa beach aron maligo ning panahon sa semana santa.

Alang kang Dakay nga kining mga semanaha maoy semana sa mga pamalandong sa kamatayon ni Kristo.

Busa kun mamalandong ang tawo, mas maayong anha sa simbahan o kaha sa sulod sa iyang balay ug dili kay moadto sa dagat aron maligo.

Matud pa ni Dakay nga didto sa dagat tua ang daghan kaayong magsul-ob og bikini ug sa higayon sa pagpamalandong sa tawo nagtutok usab siya sa hamis ug madanihon kaayong paa sa mangaligo hayan nga mosamot ang iyang sala.

Matud pa ni Dakay nga sa kagrabe na karon sa panghitabo sa kalibotan mas maayong mobalik na ang tawo sa Ginoo.

Ang pagdagsang sa lugos, patay, tulis, ilegal nga drugas ug tanang kahilayan nagumikan kini sa paghikalimot na sa tawo sa Ginoo.

Alang kang Dakay mas minus rag mabuhat nga sayop ang tawo ning mga adlaw sa pamalandong kon naa ra siya sa iyang panimalay.