Ang alarma nga nadawat sa kabomberohan sa dakbayan sa Mandaue alas 10:30 ang takna sa buntag niadtong miaging adlaw ang hingpit gayod nilang nakontrolar sa paglabay sa tulo ka minutos.
Ang nasunog mao ang bodega sa Sunboxes Corporation nga nahimutang sa Borromeo Compound sa Subangdaku, siyudad sa Mandaue.
Sa imbestigasyon nga gihimo ni SFO1 Marcial Vilvestre nasayran nga usa ka trabahante niini ang nag-welding sa sulod sa nahisgotang bodega.
Mao kini ang gipadayag ni Randy Claveria, hingkod ang panuigon ug trabahante usab sa maong dapit.
Nagtuo si SFO1 Vilvestre nga ang nangalagpot nga baga gikan sa gi-welding niini midukot sa mga sobra nga karton ug maoy nagmugna og kalayo.
Dugang pa ni Vilvestre nga si Mandaue City Fire Marshall Oscar Mayol ang mideklarar sa maong sunog ngadto sa second alarm ug gipadagan pa ang uban nga mga trak sa bombero.
Si Vilvestre miingon nga atol sa maong sunog walay gikatahong naangol ug labaw na nga walay kinabuhing nakalas.