Kaluha gipamusil patay samtang nagdu'g katu'g

Nadugang sa listahan sa gipamatay sa mga gidudahang vigilante ang tulo ka tawo diin duha kanila kaluha nga gipamusil sa managlahing dapit sa dakbayan sa Sugbo kagahapon sa kaadlawon.

Ang kaluhang dispatser diha sa dalan Magallanes nga gipangtumba giilang sila si Peter ug Paul Diosdados, 33 anyos ang mga edad ug pulos nagpuyo sa barangay Tisa ning dakbayan.

Ang duha kasamtangang nagdulog og katulog sa sidewalk diha sa eskina dalan Magallanes ug Lapu-Lapu kagahapon dihang miabot ang usa ka motorsiklong may sakay nga duha ka wala mailhing mga lalaking nagsul-ob og helmet.

Ang backrider niini maoy giingong mikanaog ug mipusil og dul-it sa nangatulog nga biktima, si Paul diha naigo sa tuong apapangig nga milapos sa iyang walang sintido ug si Peter diha usab sa tuong dunggan gidul-itan og pusil.

Daling gidala ang duha sa Cebu City Medical Center apan dangtan og pila ka gutlo namatay si Paul ug misunod usab si Peter.

Nasayran nga ang duha maoy gidudahang responsable sa mga pagpanglungkab diha sa mga sakyanan sa nahisgutang lugar apan walay mga polis nga mikumpirmar niini.

Samtang laing biktima sa vigilante style killings mao si Reyel Ortega, 31, mamaligyaay og otap diha sa pantalan ug dispatser usab kini sa mga pasahero para sa mga ferry boat sa pantalan ning dakbayan.

Si Ortega kinsa nagpuyo diha sa dalan Arellano sa barangay San Roque kasamtangang nagduwa og bilyard diha sa daplin sa dalan dihang nangabot ang duha ka wala mailhing mga lalaking pulos nagtaptap sa nawong ug kalit nga mipusil kaniya makadaghang higayon.

Pito ka basiyo sa kalibre 45 ug usa ka slug sa samang kalibre ang narekober diha sa crime scene, ang biktima nabulit og samad pinusilan sa ulo, likod ug dughan hinungdan sa hinanali niining kamatayon.

Si Ortega nasayran gikan kang JO1 Catherine Cintos sa pakighinabi sa Banat News nga nasulod kini sa Bagong Buhay Rehabilitation Center niadtong July 25,1986 tungod sa kasong murder apan na-dismiss kini ug gipagawas niadtong bulan sa Septembre 1, 1987, samtang ang kaluha walay rekord diha sa BBRC.

Ang tulo maoy ika 144 nga nabiktima sa vigilante sukad niadtong Disyembre 22,2006.