Ang suspek nga si Roel Aspera Sanchez, 20, molupyo sa Sitio Sakoptominhaw, Talisay sa naasoy'ng lungsod, gi-turn over sa hepe sa Provincial Investigation and Intelligence Branch, Sr. Supt. Juanito Enguerra ngadto kang Supt. Remegio Gregorio sa Quezon City Intelligence branch nga miabot dinhi sa Sugbu kagahapon.
Si Sanchez sa pakighinabi sa Banat News mitug-an nga niadto pang Abril 2 siya mitahan sa iyang uyoan nga tanod nga si Luisito Estopa, sakop sa Talisay barangay hall.
Matud pa ni Enguerra sa Banat News nga si Estopa na ang mitug-an kang PO2 Mamerto Gastador sa Daan Bantayan police kabahin sa krimeng gikalambigitan sa pag-umangkon niini.
Si Sanchez maoy usa sa upat ka pinangitang suspek sa pagpatay kang Larry Estandarte, ang researcher ni Korina Sanchez. Si Estandarte napalgang patay nga nabulit sa samad dinunggaban diha sa iyang giabangang balay sa Krus Naligas, Quezon City niadto pang Agosto 26, 2005
Ang suspek mitug-an nga Oktobre 1 pa sa milabayng tuig siya nauli dinhi sa Sugbu, apan iyang gipanghimakak nga siya maoy midunggab sa biktima kundili ang iyang kaubang naila lang niya sa ngalang Toto nga usa ka waray ingon man laing kaubang sila si Darwin ug Junior samtang siya diha lang sa gawas isip look-out.
Matud pa ni Supt. Gregorio sa Banat News nga gipangwartahan sa grupo ni Sanchez si Estandarte niadtong tungora apan dihang nagdumili gitabangan nila kini og dunggab ug namatay.
Ang suspek naabot sa Manila niadto pang 1997 ug nagtrabaho isip traysikol driver apan gumikan sa hitabo nibalik siya dinhi sa Sugbu.