Pirma gipaabot sa Comelec para idayon ang initiative

Padayong gipaabot sa Commission on Election (COMELEC) ang mga nahipos nga pirma alang sa Charter Change pinaagi sa People's Initiative.

Kagahapong adlawa tibuok adlaw nga nagpaabot si City Comelec Officer North Atty. Simaco Labata sa mga iduso nga pirma aron ila dayon kining kasugdan sa pag-verify.

Matud ni Labata dihang nahinabi sa Banat News niadto pang miaging semana nila nadawat ang direktiba gikan ni Comelec Commissioner Resurrecion Borra nga nagmando kanila pag-verify sa mga iduso nga pirma sa gipahigayong signature campaign.

Nagkanayon si Labata nagkinahanglan lang ang north district og tres porsyento kun 6 mil ka mga pirma gikan sa kinatibuk-ang mga rehistradong botante.

Human unya nila kini ma-verify ug mapamatud-ang tinuod ang maong mga pirma mohimo dayon sila og certification nga ilang iduso sa ilang ulohang buhatan sa Comelec ug sa Department of Interior and Local Government (DILG).

Giangkon hinuon ni Labata nga medyo makasinati sila og gamay'ng kahasol sa pagsugod unya nila sa himuong verification gumikan kay ang ilang basihan mao ra man ang listahan sa mga nakabotar niadtong piniliay sa barangay sa 2002 nga rehistrado usab sa milabay'ng 2004 presidential election.

Kini gumikan kay ang tanang mga bag-ong rekord sa Comelec dinhi sa dakbayan atua pa man karun sa kaulohan gumikan sa pending election protest ni kanhi Senador Sonny Osmeña.

Lain nilang basihan atol sa verification process mao ang putol sa gi-apod apod nga I.D. ngadto sa mga botante aron pagsiguro nga tinuod gyud ang maong mga pangalan nga mipirma sa maong signature campaign.