Kapitan, lupongi-ombud

Ang kapitan ug ang usa ka sakop sa Lupong Tagapamayapa sa Sambag II dinhi sa dakbayan sa Sugbo nag-atubang karon og kaso sa Visayas Ombudsman Visayas.

Si Kapitan Noel Wenceslao ug lupon member Lowell Belarmino gipasakaan og kaso tungod sa giingong pagdiki-diki nila pag-isyu og certification to file action ngadto sa usa ka complainant nga mireklamo batok sa iyang silingan.

Si Rogelio Amante, taga sitio Riverside, B. Rodriguez Extention, mipasangil nga sila si Wenceslao ug Belarmino nakahimo og kalapasan sa Republic Act 6713, conflict of interest, conduct unbecoming, obstruction of justice ingon man derelection of duty.

Ang reklamo ni Amante gisang-at na kagahapon sa buntag didto sa Ombudsman Visayas apan timbang-timbangon pa kini kon duna ba g'yoy basihanan nga i-upgrade kini ngadto sa usa ka full-blown investigation.

Ang rekord nagpakita nga si Amante misang-at og reklamo sa barangay batok sa iyang silingan nga si Alberto Arcaya nga iyang giingon nga mitinguha pagpatay kaniya pinaagi sa pagdala og sundang ug miadto sa iyang panimalay kaniadtong hapon sa Marso 1.

Sa duha ka hearing sa kaso, wala masulbad ang panagsungi hinungdan nga gitakda kini sa ikatulo ug katapusan nga hearing kaniadtong Abril 4, apan si Amante wala na makatambong.

Matud ni Amante nga wala siya makadawat og summon gikan sa barangay nga nag-awhag kaniya nga patambongon alang sa hearing ug mao nga wala siya makatunga atol sa maong higayon.

Sa usa ka interview sa Banat News, si Belarmino namahayag nga wala siya mabalaka nga misang-at kanila og kaso si Amante tungod kay sigurado nga matubag nila ang tagsa-tagsa niya ka punto.

Gitataw ni Belarmino nga ang barangay andam mohatag og certification to file action ngadto ni Amante apan buot kini nga sa dili pa luwatan ang maong dukomento, makigsulti una siya sa complainant.

Kini aron tin-awon kun ngano nga sa iyang motion for the issuance of the certification to file action iya mang gibutyag nga ang tawo nga iyang gireklamo hilabihan ka inpluwensyado sa mga opisyal sa barangay.