Pasil gironda pag-usab sa CIIB

Laing surpresang ronda batok sa iligal nga drogas ang malampusong napatuman sa mga sakop sa Criminal Investigation and Intelligence Branch sa Cebu City Police Office diha sa Sitio Lawis barangay Pasil ning dakbayan.

Ang ronda pinasikad sa search warrant nga gipagawas ni RTC Judge Menrado Paredes sa Branch 13 batok kang Danny Nacua kinsa gihulagway nga level two drug pusher sa lugar.

Apan ang suspek nakaikyas gikan sa kapolisan, nakuha diha sa iyang panimalay ang 43 ka paketeng may sulod nga gidudahang shabu diin gisaksihan sa mga tanod sa Pasil.

Giingong ang kahuot sa mga tawo diha sa piot nga lugar maoy gitumbok nga nakaingon sa kalangay sa 50 ka mga polis nga maabtan ang suspek sa iyang balay.

Ang suspek giingong makabaligya og 200 gramos ngadto sa usa ka kilo nga shabu matag semana .