Lote sa NRP ipabaligya sa mayor

Gipaabot nga kapin sa P580 milyones ang dugang pundo nga kita-an sa kagamhanan sa dakbayan sa Sugbo sa higayon nga mahalin na ang luna sa syudad nga giplanohang ibaligya diha sa North Reclamation Project.

Ang maong luna nahimutang sa block 10 sa north reclamation area nga dunay 4.6 hektaryas ang gidak-on kilid sa White Gold nga mao karuy gi-okopahan sa mga PUJ Terminal, Department of Engineering ug sa Mobile Patrol Group (MPG).

Ipabaligya ni Osmeña ang maong luna gumikan kay gawas nga karaan na kini nagsilbi usab kining hugaw nga talan-awon sa mga magpapatigayon gumikan kay wala kini ma-develop sulod sa dugay nang mga katuigan.

Giangkon ni Osmeña nga ang magpapatigayong Gokongwei maoy usa sa interesadong mopalit ning maong luna ug plano niyang tukoran og mga establisemento.

Giklaro ni Osmeña lahi kining maong luna sa block 27 nga maoy giplanohan sa siyudad nga i-swap kon ibaylo ngadto sa nagkatag katag nga luna sa probinsya sa Sugbo nga mao karoy gipuy-an sa kapin sa kwatro mil ka mga demolisonong urban poor dinhi sa dakbayan.

Ang halin unya niini ang gamiton alang sa mga umaabot nga panginahanglan sa siyudad. - Darrel A. Carumba. Kalisod dako og epekto sa kabataan Ni Romeo T. Limpangog

Ang kalisod sa pagpuyo sa Mandaue mao gayod ang hinungdan nga sa 10,087 ka bata, 157 niini kun 1.6 porsiyento ang namatay sa sakit sulod lang sa milabay'ng tuig.

Base kini sa initial nga resulta sa house to house survey nga gihimo sa community-base monitoring system nga giabagan sa La Salle University sa pagsuta sa kasamtangang kalamboan sa dakbayan.

Dugang pa sa mayor sa State of the City Address (SOCA) niini kagahapon sa maong gidaghanon ang singko anyos paubos nga pangidaron nasuta nga 81 kanila ang mga malnourished.

Giklaro niya nga bisan pa man niini ang dakbayan ang nahimo lamang gihapong Green Banner Awardee sa nagsunod-sunod nga tulo ka tuig.

Gidayeg usab niya ang mga Barangay Health Worker ug Nutrition Scholars nga matinud-anong nagtuman sa ilang mga kaakohan aron makabaton og himsog nga panglawas ang kabataan.

Gipaniguro ni Ouano nga sa nagpadayong paglambo sa dakbayan maoy iyang gilauman nga hinayhinay usab nga mahamugaway ang pagpuyo sa mga Mandauehanon.