Mandaue jail giluagan

Mokabat sa napulo ka binilanggo sa Mandaue City Jail ang gipadala sa kaulohan aron adto na ipadayon ang pagserbisyo sa silot nga gipakanaug sa korte sa mga kaso nga ilang giatubang.

Si Mandaue City Jail Warden Jose Moring maoy naghatod sa maong mga binilanggo ug giabaga sa ilang buhatan sa Bureau of Jail Management and Penology (BJMP) ang ilang galastohan sa pagbiyahe.

Sa napulo ka piniriso ang siyam niini mga lalaki ug gidala sa National Bilibid Prison (NBP) samtang ang usa ka babaye sa Correctional for Women sa kaulohan.

Sa nasayran kang JO1 Xyrus Ragasa sa record section sa maong bilanggoan kalikayan na ang panaghuot sa Mandaue City Jail nunot sa maong pagbalhin.

Matud pa ni JO1 Ragasa nga dunay 537 nga gidaghanon sa mga binilanggo ang igo-igo lamang gayod nga masulod sa maong bilanggoan ug kon magsobra na masinati gyud ang kahuot.

Sa pagkakaron sumala pa ni Ragasa nga ang labing bug-at nga kaso diha sa ilang mga bilanggo mao ra gyud ang "shabu 11" nga naronda diha sa shabu laboratory sa Umapad.