Pinaketeng shabu 'sakmit, 2 nasikop

Mokabat sa 13 ka pakete nga gituohang shabu ang nasakmit sa kapolisan ug nasikop usab ang duha ka tawo nga gikatahapang namaligya niini sa miaging adlaw.

Ang buy bust operation gihimo sa mga sakop sa Vice Squad Section sa Mandaue City Police Office (MCPO) gihimo sa dalan A.S. Fortuna sa barangay Bakilid.

Nadakpan sila si Andy De Castro, 23 anyos ug Dioclin Sacuana, pulos ulitawo ug lumad nga taga Hinatuan sa Surigao del Sur ug temporaryong nagpuyo sa nahisgutang dapit sa Mandaue.

Si PO3 Allan Alinsunod ug mga kauban maoy nakadakop sa mga suspek kinsa nagtingkagol na karon sa bilanggoan.

Gihimo nila ni PO3 Alinsunod ang pagdakop sa maong mga tigpayuhot natigayon human sa pipila ka adlaw nilang pagpaniid sa ilegal nga kalihokan sa mga suspetsado.

Ang kalapasan sa Section 5, 12 ug 11 sa Article 2 sa Republic Act 9165 kun Comprehensive Dangerous Drug Act maoy kaso nga gisang-at sa kapolisan batok sa maong mga dinakpan.