Tungod sa alimango amahan gitigbas

Tungod lang sa alimango, usa ka amahan ang hapit mapatay sa iyang kaugalingong anak human kini gitigbas makadaghang higayon niadtong Miyerkules sa hapon diha sa Sitio Mohon, barangay Bonbon lungsod sa Aloguinsan.

Mga samad tinigbasan sa agtang, bukton ug bukobuko maoy naani sa biktimang si Eulalio Manguilimutan, 63 anyos, ug may pito ka mga anak nga pulos na minyo apan duol rang nagpuyo sa maong lugar.

Giila ang suspek nga anak sa biktima mao si Gerby kinsa gikan pa nanagat ug misugo sa iyang manghod nga ipabaligya ang kuha niyang alimango, apan dangtan nalang og hapon wala gihapon kini mahalin hinungdan nga nasuko kini ug nagwala.

Base sa imbestigasyon, si SPO1 Julianito Molejon sa pakighinabi sa Banat News nga dili lang kini maoy unang insidente nga nagkagubot ang maong pamilya gumikan sa alimango, matud pa niya nga duna nay 20 ka rekord sa ilang police blotter ang maong pamilya nga susama sa maong kaso ang hinungdan mao ang alimango.

Matud pa niya nga niadtong tungora laing igsuon ang mibadlong sa suspek apan nasuko kini og maayo hangtud nga naabot ang biktima gikan pa milawod sa dagat ug gipakgang ang panag-away sa managsuon.

Apan nasuko si Gerby ug mikuha'g sundang dayong tigbas sa amahan makadaghang higayon hinungdan sa pagkalandig niini sa Pinamungahan District Hospital, samtang ang suspek ang nisibat usab dayun human sa hitabo.

Dili mominus sa 20 ka managsamang kaso ang natala na sa blotter sa kapolisan gikan sa maong pamilya sumala pa ni Molejon.