Most outstanding principal si Jandayan sa Zapatera

Ang mga magtutudlo sa Zapatera Elementary School nakaangkon og dakung garbo tungod kay ang ilang principal maoy migawas nga outstanding principal sa dakbayan sa Sugbo.

Si Luz Jandayan, ang principal sa Zapatera Elementary School, maoy napili nga outstanding principal sa Cebu City division kay nahulagway nga siya ang dunay labing maayo nga kalampusan.

Mga 120 ka principal ang gipilian nga makadawat sa maong pasidungog.

Samtang nakaangkon og dakung garbo ang mga magtutudlo, apan pipila kanila nasagmuyo usab kay ilang nahibaw-an nga sugod sa pagbukas sa klase karong Hunyo, hayan mahulipan na si Jandayan sa iyang katungdanan.

Giangkon ni Jandayan nga nakadawat na siya og abiso nga ibalhin na siya isip education supervisor alang sa Filipino subjects sa lainlaing mga tunghaang publiko dinhi sa dakbayan.

Wala mahibaw-i kon kinsa ang mohulip sa pwesto nga pagka principal sa Zapatera Elementary School nga talikdan unya ni Jandayan.

Ang pagpili og outstanding principal gibasi sa mga accomplishments ug performance sa mga principal.

Si Jandayan sa wala pa matudlo nga principal sa Zapatera Elementary School, siya maoy principal sa Barangay Luz Elementary School.

Gihulagway siya nga estrikto g'yod nga mopatuman og mga lagda alang sa usa ka hapsay nga pagpadagan sa gidumala niyang tunghaan.

Tungod sa maayo niyang pagdumala, ang Zapatera Elementary School daghan og naangkon nga kalampusan.

Ang mga contingents sa maong tunghaan nakadaug sa pagsalmot nila sa Sinulog kaniadtong miaging Enero. Ang iyang lima ka tinun-an mao ray bugtong taga public school nga nahimong finalist sa Metro Ayala Student Quiz for elementary.

Atol sa regional journalism contest didto sa dakbayan sa Toledo, usa sa iyang tinun-an nakaangkon sa fourth prize sa copy editing category ug kagahapong adlawa, si Princess Rene Pearl Borromeo gipasidunggan nga campus outstanding journalist of the year.