Problema sa mananagat naabot na sa kapitolyo

Problema sa mga mananagat nga naapektahan sa pagpahunong sa pagpangisda sa Visayan Marine Triangle miabot na sa buhatan ni Gobernador Gwendolyn Garcia.

Nunot niini si Garcia mipatawag og panagtigom sa mga opsiyal sa Bureau of Fishery and Aquatic Resources (BFAR) grupo sa mga mananagat, Visayan Squadron, Philippine Navy, Maritime Police ug Philippine Coastguard aron tukion ang pagpasira sa Visayan Marine Triangle karong Lunes sa alas dos sa hapon diha sa iyang buhatan.

Kahinumduman nga si Atty. Anthony Opposa ug Bantay Dagat Commissioner Elpideo dela Victoria maoy nangusog sa lakang aron mapahunong una ang pagpanagat sa mga commercial fishers ilabi na kadtong migamit sa mga "de zippers" diha sa maong kadagatan diin ang naapektahang bahin sa lalawigan mao ang Bantayan, Sta. Fe ug Madredijos.

Matud ni Garcia nga ang pagpaundang niining mga mananagat makahatag og apekto sa ekonomiya ug daghan usab ang mawagtangan sa panginabuhian ug kinahanglang masulbad ang nahisgutang problema.

Sa milabay'ng adlaw ang grupo sa mananagat nga mao ang Northern Cebu Sea First Association nga dunay 10 mil ka miyembro, Ring Net Association mibutyag ngadto ni Garcia sa ilang mga reklamo kabahin sa pagpahunong sa ilang operasyon.

Lakip sa buot sa gobernador nga makatambong mao ang mga lokal nga opisyal sa naapektahang mga lungsod aron katabangan ang mga nawad-an og trabaho nga makakita og laing alternatibong pamaagi sa pangabuhian.

Daan nang mipahibalo ang Visayan Sea Squadron nga bugtong mga dagkong panagatan lang ang maapektahan sa maong lakang gumikan kay kini lamang ang gikunsiderar nga nakaguba pag-ayo sa mga takot ug ubang kabatuhan sa maong parte sa dagat.

Gipanglantawan sa mga ekspertong langyaw nga nagkaanam na og kahurot ang suplay sa isda sa maong dagat ug kun dili kini ipahunong aron makapahuway ug makarekober sa nangadugmok nga corals sulod sa taas nga panahon, mahurot gyud ang isda sa maong dagat ug magutom gihapon ang mga mananagat ug mga umaabot nilang mga anak nga karon nagsalig lang sa dagat.