Tanod nagselos kang konsehal, nanigbas

Usa ka konsehal sa barangay ang gidunggab ug gitigbas patay sa iyang silingan nga tanod alas 8 sa buntag sa miaging adlaw sa Barangay Babayungan usa ka bukirang barangay sa Dalaguete.

Sa nasayran sa Banat News nga pangabubho ang motibo sa pagpanunggab ug pagtigbas tungod kay niadtong Lunes sa buntag gihusay na sa kapolisan sa Dalaguete.

Ang namatay giila sa kapolisan mao si Danilo Ayuban Versadas, 33, minyo, ug konsehal sa maong barangay, samtang gitumbok nga maoy mipatay mao si Alexander Amancio, 33, minyo silingan sa biktima ug tanod sa maong dapit, ang duha pulos mga mag-uuma.

Si Versadas nakaangkon og daghang samad dinunggaban ug tinigbasan sa nagkadaiyang parte sa kalawasan agi sa pinuti nga maoy gigamit ni Amancio nga maoy nakaingon sa kamatayon niini.

Si PO1 Richard Encontad sa Dalaguete Police Station nga gikahinabi sa Banat News miingon nga nagselos si Amancio sa biktima gumikan sa mga tabitabi sa mga silingan nga iyang nadunggan nga ang iyang asawa nagkukadidang ni Versadas.

Nagtuo ang kapolisan nga nahilot na kini ang ilang problema human gihusay niadtong Lunes sa presento sa kapolisan, apan niadtong Martes sa buntag misulong si Amancio sa panimalay sa biktima nga nagdala og pinuti.

Gibutyag ni PO1 Encontad nga nanghipos na unta sayo sa buntag ang biktima sa ilang mga butang aron mopuyo sa laing dapit dala ang iyang pamilya, aron sa paglikay apan nakakita si Versadas nga padung na si Amancio nga nagdala og pinuti, hinungdan nga nanaog kini og mikaratil og dagan ug gigukod.

Na korner ang biktima ug didto gipahimuslan og duslak sa pinuti hinungdan nga namatay gyud dihadiha.

Si Amancio nisurender pipila ka minutos human sa maong hitabo ngadto sa mga barangay opisyal ug mga tanod sa maong dapit dala ang pinuti ug gi-turn over usab ngadto sa Dalaguete Police Station ug natanggong na karon sa karsel samtang gipasakaan na og kaso sa kapolisan.