Magtiayon brutal nga gipatay

Managtiayong tiguwang brutal nga gipamatay diha sa tugkaran sa ilang panimalay sa Sitio Lub-ang, Barangay Managasi lungsod sa Tabogon, ang mga biktima napalgang gipanggapos niadtong Domingo sa buntag.

Si PO3 Jesus Suan, sa Tabogon Police sa pakighinabi sa Banat News miila sa mga biktima mao sila si Rufo Gulben,79 ug kapikas niining si Nemesia,74, mag-uuma sa nahisgutang lugar.

Ang managtiayong Gulben matud pa sa mga kabanay mao nalay nagpuyo diha sa ilang yutang gitikad sanglit ang mga anak nila sagad namalhin na og puyo sa siyudad sa Mandaue.

Wala pay natumbok ang kapolisan kung si kinsa ang mga kriminal nga mihimo niini apan dako ang pagtuo sa kapolisan nga posibleng dili lang duha ka tawo ang mipatay sa mga biktima, samtang wala pa usab matino kung unsay motibo sa pagpatay.

Hinuon ang managtiayon giingong kanunay'ng mamaligya og mga lagutmon diha sa mga tabo-tabo sa ilang barangay, namuhi usab sila og hayupan nga igbabaligya hinungdan nga dako ang pagtuo nga dili layong motibo ang pagpanulis.

Sumala pa sa asawa sa anak sa mga Gulben nga si Teresita Gulben sa pakighinabi sa dyAB kagahapon sa buntag nga naabtan nila ang makaluluoy nga posisyon sa iyang ugangang babae nga gihiktan ang liog, mga kamot ug tiil diha sa punoan sa sagingan pila ka metros gawas na sa ilang balay.

Samtang ang lalaking Gulben diha mapalgi sa may atabay nga mas layo pa sa ilang balay, gituuhang gipatay ang mga biktima nianang Sabado sa gabii sa wala pa mailhing mga suspek.

Ang maong barangay sumala pa ni Suan sagad nang dunay masigpatang mga sakop sa New Peoples Army.

Nakit-an sa silingang si Pancrasio Povadora ang mga biktima nianang buntag sa adlaw'ng Domingo samtang kini mopadulong na sa iyang umahan sumala pa sa kapolisan.

Wala hinuoy nakitang agi sa pinusilan ug dinunggaban ang duha apan duna kini mga samad sa nawong ug ulo nga gituuhang agi sa pagpamunal gamit ang usa ka gahing butang.

Nakuha diha sa crime scene ang usa ka bolo, usa ka batong dunay lama sa dugo ug ang pising maoy gipanggapos kanila.

Ang pamilya naglaraw sa pagpatabang sa buhatan sa National Bureau of Investigation aron mapadali ang pagkasikop sa mga suspek.