Duha ka distrito sa Cebu City OK mag-cha-cha

Sobra sa tres porsyento sa gikinahanglan nga mga botante sa matag distrito sa dakbayan sa Sugbo ang nakapirma alang sa people's initiative campaign tumong sa pag-usab sa sistema sa panggobyerno sa nasud.

Kini maoy gibutyag ni Representative Raul del Mar sa north district, diin kapin sa 12 porsyento sa mga rehistradong botante ang nakapirma samtang kapin usab sa 10 porsiyento ang sa South District sumala usab ni Representative Antonio Cuenco.

Matud pa ni del Mar nga mosaka pa ang maong gidaghanon sanglit ang mga lider sa kabarangayan padayon pang nangayo sa suporta sa katawhan.

Sa niaging eleksiyon sa tuig 2004, dunay 473,678 ka rehistradong botante sa duha ka distrito sa dakbayan sa Sugbo base sa rekord sa Commission on Elections.

Sayo niini si Cuenco niingon nga ang people's initiative maoy bugtong paagi nga mausab ang Konstitusiyon human napakyas ang Charter Change pinaagi sa Constitutional Convention o Constitutional Assembly.

Matud pa ni del Mar nga iyang iduso ngadto sa Comelec ang petisyon alang sa authentication.

"If the nationwide petition goes well, and already submitted to the Comelec, a plebiscite is then scheduled in 60 days or not later than 90 days after verification of all signatures," nagkanayon si del Mar.

Gikinahanglan nga dunay partido nga moduso sa petisyon ngadto sa Comelec ug gi-notaryohan og abogado.

Kahinumduman nga si del Mar kinsa nangampanya alang sa Cha-Cha supak sa samang paagi atol sa administrasyon ni kanhi Presidente Fidel Ramos gumikan kay ang gitinguha niini mao man ang paglugway sa termino sa presidente ug dili alang sa interes sa katawhan.