Mayor sa Naga mitaliwan gahapon

Mitaliwan kagahapon sa ala-una sa hapon ang Mayor sa Naga nga si Ferdinand Chiong tungod sa sakit nga cancer.

Si Chiong nagpanuigon og 53 kinsa nag-antos sa stomach cancer nakabsan sa kinabuhi diha sa Cebu Doctors Hospital niining dakbayan.

Gibutyag kagahapon ni Valdemar manghud sa mayor nga maoy bise-mayor karon sa Naga tulo na ka semana ang milabay nagduwa pa og tennis ang iyang maguwang dihang kalit kining gisakitan sa tiyan hinungdan nga gidala nila sa tambalanan. Diha pa mahibaw-i nga dunay sakit nga cancer ang mayor.

Si Kongresista Eduardo Gullas sa unang distrito sa Sugbo kinsa mibisita pa ni Chiong sa tambalanan niadtong Domingo sa hapon nagkanayon nga reverse isolation na ang iyang higala ug wala siya magdahom sa nahitabo karon ni Chiong.

Matud ni Gullas nga si Chiong naglantaw ug naglaom nga ang lungsod sa Naga mahimong dakbayan."His one Mayor who had hope to see his town to become a city" ni Gullas pa.

Si kanhi Kongresista Jose "Dodong" Gullas wala usab makatuo sa gidangatan ni Chiong, matud pa niini nga usa ka loyal ug dedicated nga lider si Chiong ug susama na kini nilang igsoon.

Karong tuiga maoy ikatulong termino ni Chiong pagka-mayor sa nahisgutang lungsod.

Niadtong tuig 1998 hangtud 2001 si Chiong nahimong Mayor sa Naga ug ang iyang kontra sa politika karon nga si Paulino Ong maoy iyang kanhi bise.

Sa piniliay sa tuig 2004 ang maguwang ug manghod nagpapili pag-usab sa mao gihapon nga mga posisyon ug kaatbang gihapon ni Chiong sa pagka-mayor sa lungsod si Ong.

Sa laing bahin mitaliwan na usab sa kinabuhi ang kanhi mayor sa Bogo sa edad nga 62, si Reynaldo Dy niadtong Marso 28 niining tuiga sa alas 10:00 sa gabii diha sa iyang balay tungod sa balatian sa panglawas.

Gibutyag ni Lyla Claire Dy Renejane, 28-anyos, anak sa kanhi mayor nga niadtong buwan sa Enero ning tuiga ang iyang amahan mialsa og usa ka case nga litrong soft drinks dihang kalit lang kining gisakitan sa iyang likod.

Matud ni Claire nga niadtong Pebrero wala na makabarog ang iyang amahan ug maglingkod bisan magtrabaho diha sa ilang balay tungod kay usa kini ka pribadong manlalaban.

Si Claire nagkanayon nga gi-admit sa pribadong tambalanan ang amahan ug gidala pa sa Manila. Apan gibalik nila kini sa Bogo og diha na magpundo sa balay ang kanhi mayor hangtud nga nakabsan gyud kini sa iyang kinabuhi

Ang asawa ni Dy nga si Dita, 53-anyos mibutyag kagahapon sa Banat News nga ang iyang bana nagsugod pagka konsehal sa lungsod niadtong tuig 1971 hangtod 1979. Sa tuig 1987 hangtod 1998 si Dy nahimong Mayor sa Bogo ug nagpapili pag-usab sa maong posisyon niadtong 2001 apan gipildi kini sa piniliay ni Mayor Celestino Martinez III.