Mani nagbaha sa Negros

Dumaguete City - Nagbaha karon ang mani didto sa Negros Oriental ug maoy suliran karon sa kagamhanan sa lalawigan ang pagpangita og buyer sa ilang produkto.

Matud pa ni Provincial Agriculturist Gregorio Patinca nga may nakaplagan silang mamamalit og mani nga taga Tagbilaran City, Bohol, apan usa ra ka tonilada ang gikinahanglan niini.

Dili pa dugay nakaani ang mga mag-uuma og mani sa Negros Oriental og 100,000 ka toniladas, sa dihang gipasiugdahan sa kagamhanan ang "plant now, pay later" nga sistema.

Matud pa ni Patinca nga gigahinan sa kagamhanan sa lalawigan og P1 milyon para sa mga semilya sa mani nga giapod-apod ngadto sa mga mag-uuma.

Sa pagkakaron may ginagmay'ng negosyanteng mamalit og dili pinanitang mani sa tag P14 ang kilo samtang ang gobyerno namalit og tag P20 ang kilo sa dili pinanitan, ug ang negosyanteng taga Bohol, P45 matag kilo pero pinanitan, matud pa ni Patinca.