Bidding sa luna sa kapitolyo sa Banilad giuktaba una

Giuswag karong petsa 26 niining buwana ang ipahigayong bidding sa 2.8 ektaryang lote diha sa Banilad niining dakbayan tungod sa hangyo sa mga bidders niini.

Gihisgutan kagahapon ang mga rules ug proposals kabahin sa umaabot nga bidding nga gikatakda untang himuon karong April 10 apan gumikan sa hangyo sa upat ka bidders ibalhin kini sa bag-ong petsa.

Gibutyag kagahapon ni Gobernador Gwendolyn Garcia nga base sa gikasabutan mahimong gamiton sulod sa 25 ka tuig ang maong luna sa mga negosyante nga makadaog sa bidding ug ang maong mga negosyante mag-abang sa luna.

Matud ni Garcia nga ang mga negosyante mopabarog og mga facility diha sa maong luna nga dili moubos sa P250 milyones ug ang ilang mga proposal i-base sa present net value nga standard sa table rate.

Sa pagkakaron dunay upat ka mga bidders nga mipakita og interes sa pagbubo og puhunan sa maong luna kini mao ang SM Prime Holding, SM Hyper Mart, Philippine Beijing Motors ug Cebu Oversea Hardware.

Gilauman ni Garcia nga sugod sunod tuig ang kagamhanan sa probinsiya sa Sugbo makadawat na og abot sa maong lote kini kun hingpit nga masirado ang deal sa kagamhanan ug sa mga negosyante.