Gitabanga'g luba sa mga Akhro

Kritikal ang kahimtang sa usa ka lalaki human kini tabangi og luba sa gidudahang mga sakop sa Alpha Kappa Rho (Akrho) fraternity kagahapon sa kaadlawon diha sa eskina Fairview Village, Highway Lawaan III, Talisay.

Si William Dayanan, hingkod ang panuigon residente sa Sitio Pungsod, nakaangkon og mga samad dinunggaban sa iyang lawas daling gidala sa Talisay District Hospital apan tungod sa kahimtang niini gibalhin kini sa Chong Hua Hospital.

Base sa imbestigasyon sa kapolisan sa Talisay nga ang biktima nagbarog diha sa lugar nga nahitaboan kalit kining giduol sa mga sakop sa Akrho ug gitabangan sa pagdunggab.

Ang mga suspetsado daling mibiya sa lugar human sa maong insidente.

Ang Homicide Section sa kapolisan sa Talisay padayong nag-follow-up sa maong insidente.

Sa laing bahin, usa ka gikatahapang dunay deperensiya sa pangisip nanunggab sa drayber sa traysikol nga iyang gisakyan niadtong Sabado sa buntag diha sa Poblacion, Toledo.

Si Ramonito Hermosa, 23-anyos, taga Captain Claudio sa maong dakbayan nakaangkon og tulo ka samad dinunggaban sa iyang lawas daling gidala sa Toledo District Hospital.

Si Romulo Soyla, 24-anyos-kinsa suspetsado sa maong insidente boluntaryong mitahan sa iyang kaugalingon sa kapolisan sa Toledo.

Gibutyag kagahapon sa Banat News ni SPO3 Basiliso Balicoco desk officer sa kapolisan sa Toledo nga si Soyla misakay sa traysikol nga gimaneho ni Hermosa isip back rider ug sa walay igong hinungdan gidunggab niini ang biktima.

Matud ni Balicoco nga gikatahapan nilang dunay deperensiya sa pangisip si Soyla tungod kay mosibag ang tinubagan niini dihang ila kining giimbistigar.

Si Balicoco nagkanayon nga gibutyag ni Soyla kanila nga dunay gasugo kaniya nga ipadunggab si Hermosa apan wala niini itudlo kun kinsa ang nagsugo kaniya.

Si Soyla nagtingkagol karon sa Toledo detention cell.