Pamilya gi-masaker sa papa

Usa ka bana nga milayas kay gihinginlan human nasakpang nanglili sa humablos nga dalaga mipauli ug gihurot sa pagpanunggab ang mga sakop niini sa pamilya.

Nahitabo kini alas 4 pasado ang takna sa miaging Domingo sa kaadlawon sa Saac Buaya, sa Lapulapu.

Ang suspetsado mao si Alberto Cabodbod, 38 anyos, kinsa dali nga nakasibat pahilayo ug wala gayod madakpi sa paggukod unta niini sa mga polis.

Ang mga biktima mao sila si Renera Cabodbod, 45 anyos, asawa ni Alberto Irish Cabodbod, 13 anyos nga ilang anak ug Janice Harabi, 21 anyos nga anak sa asawa sa iyang pagkadalaga.

Matud pa ni SP03 Bonifacio Montecillo sa Lapulapu Police Station nga gikahinabi sa Banat News nga niadtong miaging adlaw gipalayas sa asawa ang suspetsado human masakpi nga si Janice gilili niini sa lawak samtang nag-ilis sa iyang sapot.

Sa miaging Sabado sa gabii ang suspetsado mibalik sa ilang panimalay sa gabii na ug mihangyo kang Renera nga makigsulti apan gibalibaran nga maoy hinungdan nga mibiya kini sa maong lugar.

Apan mibalik si Alberto nianang pagka Domingo sa kaadlawon ug si Janice nga maoy unang nakamatngon misiyagit sa pagpangayog panabang sa mga silingan.

Si Roberto nga gibati og kapungot mikuhag kutsilyo ug gidunggab niini sa dughan ug bukobuko ug ang inahan nga si Renera nga nahigmata midali sa pagtabang ug nasamad usab sa bukton.

Ang laing biktima nga si Irish nga anak sa magtiayon misulay usab sa pagbadlong apan mao usab ang naigo sa pagdunggab ug nasamdan kini sa abaga.

Dugang pa ni Montecillo nga nagdali sa paghimog pakisusi ang mga silingan ug nakamatikod si Roberto nga maoy nakaaghat niini sa pagsibat.

Dali nga gidala sa tambalanan ang mga samaran nga biktima nga nagkadugo ang kalawasan ug si Janice nga nagrabehan gibalhin sa Vicente Sotto Memorial Medical Center.