Gibunalag tubo, gidunggab patay sa kauban

Usa ka construction worker nga natulog ang wala na makamata human gibunal-bunalan ug tubo dayong gidunggab makadaghang higayon hangtud namatay sa iya rang kauban sa trabaho sa milabayng gabii.

Ang krimen nahitabo diha mismo sa gitrabahuang construction site sa Maria Luisa Village sa barangay Busay sa dakbayan sa Sugbo.

Ang biktima mao si Felix Repuyla, hingkod ang panuigon, ulitawo nga lumad nga taga barangay Liong sa lungsod sa Dumanjug ug nagtrabaho isip mason sa construction site sa maong dapit.

Ang gitudlong nipatay kaniya mao si Marianito Marfil Roquero, hingkod ang panuigon, lumad nga taga Negros Oriental ug temporaryong nagpuyo sa barangay Cubacub sa dakbayan sa Mandaue kinsa mitahan sa Mabolo police station.

Ang biktima napalgan sa iyang mga kauban nga naligo na sa kaugalingong dugo ug wala nay kinabuhi, samtang ang mamumuno daling nakaikyas palayo sa lugar.

Mao kini ang nasayran kang SPO2 Zenaido Pastorfide sa Homicide Section sa kapolisan sa dakbayan sa Sugbo nga maoy nakatubag sa maong alarma.

Gitinguha ni Mayor Thadeo Ouano ang pagkonsiderar sa kamandoan nga pagtangtang kang Senior Superintendent Eduardo Catabas nga director sa kapolisan sa maong dakbayan.

Ang maong tinguha sa Mayor iyang gipadangat pinaagi sa sulat ngadto ni Chief PNP, Director General Arturo C. Lomibao.

Sa maong sulat iyang gihangyo si Lomibao sa pagkonsiderar lamang sa giluwatan niining kamandoan nga pagtangtang kang Catabas ug hatagan pa og panahon nga ikapakita niini ang katakus sa pagpangulo sa kapolisan sa dakbayan.

Sa nasayran nga gibase ni Lumibao ang pagtangtang kang Catabas sa katungdanan sa "one strike policy" niini ug nasutang pakyas kini sa pagtuman.

Ang kapakyas ni Catabas sa pagpakgang sa mga ilegal nga sugal nasuta human usab sa malampusong pagpangsakmit sa mga sakop sa anti gambling task force sa video karera ug masiao sa makatulo ka higayon nga maoy nakaingon sa pagkatangtang usab sa mga hepe niini sa tulo ka presinto.

Ang anti-gambling task force nakahimo kini sa pagpangronda ug nakasakmit pa gayod kini og mga ebidensiya ug nakasikop usab ang suspetsado.

Sa iyang sulat ni Ouano kang Lomibao nga ang kapolisan sa Mandaue City Police Office (MCPO) nagsugod na sa pagpangandam alang sa ASEAN Summit karong Disyembre niining tuiga.

Ang pagpangandam sa siguridad sa dakbayan atol sa maong kalihokan gihatagan gayod sa tanang suporta sa iyang buhatan nga naglakip na sa pinansiyal ug uban pang panginahanglan sa kapolisan.

Sumala pa ni Ouano nga pipila pa lamang ka adlaw si Catabas nga miasumir sa katungdanan ug dili gayod makiangayon ang pagtangtang kang Catabas sa katungdanan sanglit wala pa man kini makabuylo sa pagpatuman sa gihan-ay niining mga programa ug plano.