Imbes buhian gipangitaan hinuon og buyer? Duha ka toneladang isda namatay

Usa ka duha ka toneladang whale shark nga mas naila sa mga Cebuano nga "tiki-tiki" kon "butanding" sa Boholano ug Tagalog ang nadakpan sa mga mananagat sa barangay Tangke dakbayan sa Talisay niadtong Biyernes sa kaadlawon.

Apan imbes nga iuli sa dagat giingong gipangitaan hinuon kini og buyer sa mga mananagat hinungdan nga namatay kini diha sa gigaposang mabaw nga bahin sa dagat sa Sitio Salvador sa nahisgutang barangay.

Si Ulyssis Fernandez, ang tsirman sa Fishermen Sea and Ecological Care (FISECA) sa dakbayan sa Talisay mitug-an nga nakuha ang maong siyam ka tiil nga isda diha sa kadagatan sa barangay Ibo dakbayan sa Lapulapu pinaagi sa panagatang "pamo" kon pukot nga itaan og magabii.

Usa ka Jaime Cabrillos ug mananagat nga naila lang sa ngalan nga "Barton" pulos mga residente sa Sitio Salvador, Barangay Tangke maoy nakakuha niini apan ang panagatan gipanag-iya ni kapitan Cesar Abapo sa barangay San Roque sa nahisgutang dakbayan.

Si Elma Barro, usa sa mga opisyal sa Coastal and Marine Management Division sa Department of Environment and Natural Resources -7 sa pakighinabi sa Banat News nagkanayon nga duna siya'y nadawat nga impormasyon nga gipangitaan kini og buyer sa mga mananagat ang isda apan dihay duha ka mga mopalit unta ang wala modayon og palit gumikan kay posibleng nahadlok nga madakpan sanglit gibawal ang pagkuha sa maong matang sa isda.

Si Fernandez nagkanayon nga duna gyuy interes nga ibaligya ang maong isda gumikan kay imbes nga gibuhian unta kini dayon dihang nasangit sa pukot giguroy hinuon sa mga mananagat padulong sa Talisay ang maong isda gikan sa Ibo, Lapu-Lapu pinaagi sa paghikot sa ikog ug giguroy nga paatras hinungdan nga naluya ang isda ug nalumos.

Nakita kagahapon sa Banat News nga dunay dakong samad agi sa hiniktan sa pisi ang maong isda diha sa iyang ikog dihang gisusi uban sa mga sakop sa FISECA ug DENR sa tuyo unta nga buhian kini og balik sa dagat apan patay na kini.

Giklaro ni Barro nga ang whaleshark kon 'tiki-tiki' dili mokaon og isda, labaw nang dili kini mokaon og tawo, gani gihimo na kini karong toursit attraction sa pipila ka bahin sa Bohol imbes nga dakpon sa mga mananagat.

Kagahapon uban sa mga sakop sa FISECA ug NGO ang Banat News miuban sa pag-scuba diving sa Lagundi Reef aron saksihan ang maanindot nga coral reefs nga gipaningkamutang protektahan sa maong grupo batok sa mga abusadong mananagat.

Ang grupo gipanguluhan ni dive master Anthony Nator sa Talisay City Swimming and Lifesaving Association ang maong pagbisita sa maong "takot" diin gipakaon usab ang mga isda.