Estella nanghunaw sa taho

Nanghunaw ang kasamtangang presidente sa Association of Barangay Council (ABC) Rodulfo Estella sa mga mikatap nga mga taho may labot sa giingong nakadawat og suhol silang mga barangay kapitan dinhi sa dakbayan sa Sugbo atol sa milabay'ng tinuig nga asembliya sa barangay niadtong adlaw'ng Sabado diin gilusad sa Department of Interior and Local Government (DILG) ang signature campaign alang sa planong pag-amendar sa konstitusyon pinaagi sa People's Initiative.

Gibutyag ni Estella, kapitan sa barangay Mambaling dihang nahinabi sa Banat News nga wala gyud siyay nadawat bisan usa ka daku isip suhol sa pag-apod apod nila sa maong porma aron papirmahan sa mga molupyo.

Bisan si San Jose barangay captain Rodegilio Arinasa, ang acting treasurer sa ABC mihimakak usab kini sa pasangil nga dunay gipanghatag nga salapi bugti sa pagpapirma nila sa maong mga porma sa mga molupyo sa ilang lugar.

Giangkon nila ni Estella ug Arinasa nga naglibog sila kun si kinsa ang mitanyag og salapi ngadto kang Ermita Barangay Captain Felisicimo Rupinta aron lang mo-apod apod kini sa maong papirmahan nga mga porma.

Giangkon hinuon ni Estella nga wala pa gyuy klarong baruganan ang liga pagkakaron kun mopabor ba o dili sa giduso nga People's Initiative gumikan kay alang niya premature pa nga himuon kini tungod kay wala pa gyud mahatagi og tukmang kasayuran niining maong isyu ang mga Sugboanon.

Nunot niini, gitakdang susihon ni Estella ang mga opisyal sa barangay aron mahibaw-an kun si kinsa kadtong barangay ang napakyas pagpahigayon sa maong tinuig nga asembliya.