Basurahan sa tunghaan gisirad-an sa DPS

Gipasirhan sa Department of Public Service (DPS) ang basurahan sa usa ka eskuylahan sa gobiyerno ning siyudad tungod sa paghitak sa basura niini matud pa ni Bimboy delos Santos, ang inspektor sa basura.

Matud pa ni delos Santos nga mipabuhagay sa iyang sentimento didto sa DYMR Radyo ng Bayan, sa tulomanon Government on Line niini, nga duha gyud ka tuig ang ilang inantos nianang basurahan sa Cebu State College of Science and Technology (CSCST).

Ang maong basurahan nahimutang sa atubangan sa eskuylahan sa dalan MJ Cuenco Ave. nga sakop sa barangay San Roque.

Ang namatngonan ni delos Santos nga pirme lang puno ang maong basurahan matag adlaw ug sa panahong kolektahon sa trak sa basura, dili maabli ang pultahan niini kay gigakotan man og maayo.

Maoy hinungdan nga ang mga "scavenger" maoy mokatkat niini ug isaliyab lang sa daplin sa karsada ang mga basura nga ilang pinilian sa ilang ikabaligya.

Matud pa ni delos Santos nga dugay nang naglabad ang ulo nila ilabi na nga wa gyud usab magtagad ang kadagkoan sa eskuylahan sa pag-atiman aron mahakot sa mga trak sa basura sa siyudad ang ilang hugaw.

Gumikan niini mipugos gyud si Engr. Dionesio Qualiza, ang hepe sa DPS pagduol sa tagdumala sa eskuylahan niadtong Huwebes ug gimandoang papangitaon og laing lugar nga kalabayan nila sa basura.

Kini pagsiguro nga trak na gyud sa DPS maoy makahakot sa basura ug dili kay ang mga nanguykoyay og basura.