Usa sa mga biktima maoy nakapusil ug miangol kang PO2 Ranelito Montañez, sakop sa Operations Division sa Cebu Provincial Police Office ug laing duha ka tawo niadtong Disyembre 17, 2005 diha sa Sitio Lower Kawayan, barangay Sambag 2 ning dakbayan.
Unang gitumba mao si Romeo Rico, ilado sa bansag nga Micmic sa ilang lugar ug dugay nga gipangita sa kapolisan sa nahisgutang lugar, kinsa uban sa iyang igsuon maoy nakapusil kang Montañez.
Usa ka multicab nga light color nga van type ug usa ka kolor pulang Aura nga motorsiklong dunay mga sakay nga pulos nag-bonnet ug nagsapaw og helmet ang mitipi sa biktima.
Sumala sa imbestigasyon sa Homicide Section si Rico nakit-ang mikanaog sa motorsiklo nga gisakyan samtang ang kaubang drayber nagpaabot kaniya nga mahuman pagpangihi diha sa dalan Acacia sa barangay Capitol Site pasado alas 7 sa gabii.
Diha-diha ang maong multicab ang kalit nga mihunong diha sa gikahimutangan sa biktima diin duha ka tawo ang mikanaog ug mipusil kaniya makadaghang higayon, dayong naglumba og pangikyas.
Sumala pa sa inahan sa biktima nga si Alfreda gipik-ap sa iyang higala ang iyang anak didto sa dakbayan sa Mandaue apan diha-diha gisundan kini dayon og multicab.
Wala pa matino kung si kinsa ang mi-pick ap sa biktima nga giingong higala niini sanglit wala na sad kini igkita sa kapolisan human sa insidente.
Nakuha diha sa crime scene ang siyam ka basiyo sa kalibre 45 nga bala, duha ka bala sa kalibre 38, usa ka cellphone, usa ka inside holster,duha ka panyo nga pula ug blue ug usa ka wala matinong slug.
Samtang kagahapon sa buntag diha sa gate sa Pier 6 sa barangay Mabolo, dakbayan sa Sugbu gitumba si Felix Bersano, alyas Kaloy, 30, molupyo sa nahisgutang lugar, usa ka wala mailhing lalaking nagsuot og kolor puti nga T-shirt ug pantalon ug nagtaptap sa nawong ang mipusil sa biktima.
Sumala pa bag-uhay pang nakapamahaw ang biktima sa usa ka karenderya dihang giduol sa suspek ug kalit nga gipusil apan mikagar ang armas hinungdan nga nakadagan ang biktima apan gigukod kini ug gipusil tulo pa ka higayon hinungdan sa kamatayon niini.Ang biktima maoy gidudahang responsable sa panglabni sa maong lugar.
Apan gipanghimakak kini sa iyang mga kabanay ug mitug-an dako ilang pagtuong mga vigilante ang mipatay kang Bersano apan gumikan kay naalaan lang kini tungod kay pareho kini og angga sa banggiitang isnatser ug tulisan diha sa maong lugar nga alyas Caloy nga kauban ni Junjun Piskat.
Hinuon giangkon nilang nasulod na sa BBRC si Bersano gumikan sa kasong paghingos og rugby.