Gibalibaran og inom nanigbas

Usa ka lalaki nga nasuko sa dihang gibalibaran og inom nanigbas sa miaging kaadlawon sa sitio Lapyahan, Labogon Mandaue.

Ang biktima mao si Ronnie Refana, 24 anyos, ulitawo, nagpuyo sa maong dapit.

Nailhan lang sa ngalan nga Nelson ang nagtigbas sa biktima ug bag-o lang nga walay klarong pinuy-anan.

Sa imbestigasyon nila ni PO3 Roberto Hugo sa Presinto 3 sa kapolisan sa maong dakbayan nga nalabyan lang sa biktima ang suspetsado nga nag-inom uban sa mga higala.

Gitawag ang biktima sa suspetsado ug gitunolan unta og baso nga may sulod nga ilimnon apan gibalibaran kini kay dili kini moinom og ilimnong makahubog.

Daw na-insulto ang suspetsado sa pagbalibad sa biktima ug nasuko dayong kuha og sundang ug nanigbas.

Nakabaton ang biktima og mga samad sa kalawasan ug dali kining gidala sa Vicente Sotto Memorial Medical Center.

Ang suspetsado kinsa dali usab nga nakasibat pahilayo sa maong dapit gipangita sa mga polis.