Loot sa CPPO mapiangan

Mapiangan ang Cebu Police Provincial Office ubos ni Sr. Supt. Vicente Loot sa pagkabuwag sa hepe sa operation branch nga si Supt. Romeo Perigo.

Si Perigo molingkod isip kasamtangang hepe sa kapolisan sa dakbayan sa Talisay sugod ugmang adlawa nunot sa pagbakasyon unya ni Supt. Audie Villacin aron pagpangandam sa iyang pagkuha sa Bar Examinations sa pagka-abogado.

Apan matud pa ni Loot nga iyang gikonsiderar ang daku usab nga panginahanglan nga ibutang si Perigo sa dakbayan sa Talisay gumikan sa kadaku sa tahas niini ilabi na sa kampanya batok sa ilegal nga drugas.

Sakripisyo alang kang Loot nga mabuwag kaniya si Perigo kinsa iya na nga gikauban niadtong siya pa ang hepe sa Narcotics Command sa rehiyon 7.

Gihulagway ni Loot si Perigo nga but-an nga tawo ug walay dautang rekord bisan sa iyang pagka-istrikto.

Gimandoan ni Loot si Perigo nga disiplinahon ang mga abusadong polis sa dakbayan sa Talisay kinsa giingong nagsalig og mga politiko sa ilang katungdanan.

Gipasabot ni Loot nga dili mahimo nga ang hepe maoy moagad sa kinaiya sa iyang mga sakop bisan wala kini nasubay sa insakto.

Wala nabalaka si Loot nga dauton ang pagkatawo ni Perigo sa mga politiko sa dakbayan sa Talisay kon igo lang kini maghimo sa iyang gimbuhaton.

Mahimong magpabilin si Perigo isip hepe sa dakbayan sa Talisay human sa 30 ka adlaw kon mauyonan sa mayor sumala pa ni Loot.