Bata gikulata sa 'Crips Gang'

Nakaangkon og mga bun-og sa ilang lawas ang tulo ka estudyante human kini tabangi og kulata sa mga sakop sa Crips fraternity niadtong Martes sa gabii diha sa Barangay Tabunok, Talisay.

Si John Clester Engbino, Nestor Alcantara ug Christian Jay Tan, pulos 16-anyos, mga estudyante sa Immaculate Heart of Mary ug mga residente sa lungsod sa Minglanilla kinsa nakaangkon og mga bun-og sa lawas daling mitaho sa kapolisan sa Talisay kabahin sa maong insidente.

Kalit lang mitungha ang grupo sa Crips ug mibabag sa giagian sa tulo ug sa walay pangutana gitabangan og kulata ang mga biktima apan swerte kay nakadagan kini palayo sa mga suspetsado ug mideretso sa buhatan sa kapolisan diha sa Barangay Poblacion.

Kahinumduman, niining tuiga ang maong grupo ug ang kaatbang niining grupo nga Bloods nang-recruit og mga estudyante sa elementarya sa usa sa tunghaang pampubliko sa Talisay.

Ang maong mga grupo usab walay kahadlok nga mosulod sa tunghaan kinsa manghudlat pa sa mga magtutudlo kung badlongon.