Baybayon sa Talisay himuan og programang magprotehir niini

Kabaybayonan sa Talisay gipangitaan og paagi sa kagamhanan sa siyudad para mapreserba kini hinungdan nga mipahigayon sila og seminar pag-edukar sa mga opisyal sa pito ka coastal barangay sa dakbayan.

Gisugdan niadtong Martes sa buntag ang seminar sa Coastal Resource Management and Participatory Coastal Resource Assessment nga gipahigayon diha sa Talisay City College sa Barangay Poblacion.

Ang nahisgutang seminar gitambongan sa mga opisyal sa Barangay Poblacion, Dumlog, Biasong, Pook, Cansojong, Tanke ug San Roque, mga grupo sa mananagat, non-government organization (NGO) ug lakip na ang mga opisyal sa dakbayan mitambong usab niini.

Gibutyag kagahapon ni Konsehal Bernard Joseph Odilao tsirman sa environment nga ang kagamhanan nangita og paagi nga mapreserba ang kabaybayonan sa siyudad para sa kaayohan sa mga Talisaynon.

Matud ni Odilao nga ang Department of Environment Natural Resources (DENR) mihatag og ayuda sa maong kalihokan.

Si Odilao nagkanayon nga ang usa sa sentro sa maong seminar ang pag-edukar sa mga mananagat sa pag-amping sa kinaiyahan para mapahimoslan pa kini sa mga mosunod nga henerasyon.

Si Odilao mibutyag nga ang DENR mohatag usab og ayuda sa mga mananagat sa siyudad pagpananom ug mga bakhaw nga usa sa pasilonganan ug itloganan sa mga isda, sea grass ug mga goso sa kabaybayonan sa Talisay.

Si Odilao miawhag sa mga Talisaynon nga mohatag og ayuda kanila sa maong proyekto tungod kay nakahatag kini og dugang panginabuhian sa mga mananagat sa dakbayan.

Si Odilao midungag nga sulod niining tuiga base sa taho sa grupo sa Fisherman Sea and Ecological Care (FISECA) wala nay mipahigayon og dynamite fishing sa Talisay.

Ang kasagarang masikop sa maong grupo mao ang mga managat nga milapas sa boundary sa pagpanagat ug mga ilegal nga troso nga anha Iagi sa baybayon sa siyudad.