Gabuya ikiha sa Akbayan – Cebu

Nagplano ang mga militanting pundok dinhi sa Sugbo nga mosang-at og reklamo batok sa mga opisyal sa gobyerno nga nakig-kunsabo aron maniobrahon ang signature campaign sa milabay'ng synchronized barangay assembly niadtong Sabado aron molampus ang Charter Change (cha-cha) pinaagi sa People's Initiative.

Gitinguha sa Akbayan Cebu ang pagsang-at og reklamo batuk kang Department of Interior and Local Government (DILG) Cebu City Director Patricio Gabuya ngadto sa Ombudsman Visayas gumikan sa pag-apil apil niini sa mga kalihukan sa politika.

Matud ni Alvin Dizon, secretary general sa Akbayan-Cebu gipahimuslan sa mga opisyal sa DILG ang tinuig nga asimbliya sa mga kabarangayan aron maduso ang politikanhong tinguha sa administrasyon.

Gisaway sa militanting pundok nga Akbayan ang paggamit sa pundo sa gobyerno aron trabahoon ang signature campaign alang sa Cha-cha.

Nagplano karon ang maong grupo nga mohimo og sumbalik nga lakang aron alkontrahon ang gilusad nga signature campaign sa DILG.

Tinguha sa maong grupo nga magbutang og mga porma sa mga publikong lugar sama sa kamerkadohan ug mga terminal dinhi sa Sugbo aron pagkuha usab sa pirma gikan sa mga tawong supak sa Cha-Cha.

Sayo niini, si Mayor Tomas Osmeña mipadayag usab og pagsupak niining planong pag-usab sa Konstitusyon pinaagi sa People's Initiative aron mapahigayon ang Chacha.

Gani kumbinsido kini nga dili mosaler ang signature campaign nga gitumong aron pagkuha og 12 porsiyento gikan sa kinatibuk-ang rehistradong botante sa nasud aron maoy basihan sa Comelec sa pagpahigayon og plebisito.