Nakahigayon si Osmeña pagpaabot niining mao niyang hangyo ngadto kang CIDG-7 chief Sr. Supt. Jeorge Corpus atol sa gihimong courtesy call sa maong opisyal ngadto sa mayor kagahapon sa buntag.
Atol sa hamubo nilang paghinabi gihisgutan niini ang mga pamaagi nga himuon aron mahatagan og higpit nga seguridad ang dili mominos 17 ka mga pamuno nasud nga gitakdang motambong sa maong kalihukan apil na ang mga sakop niini sa gabinete.
Wala hinuon motug-an si Corpus ngadto sa mga tigbalita sa uban pang mga butang nga nahisgutan nila ni Osmeña gumikan kay makonsiderar kining confidential ug dili angay'ng ipahibalo sa publiko aron dili masakpan ang mga pagpangandam nga ilang himoon.
Hinuon gitug-an ni Corpus nga gihatagan siya og listahan sa mayor sa mga tawong gitumbok nga nalambigit sa mga ilegal nga kalihukan dinhi sa dakbayan aron ilang mamonitor ug mapakgang ang mga giplanohan niining dautan nga himuon.
Si Corpus maoy gitudlong hulip sa girelibohan nga hepe sa CIDG-7 Sr. Supt. Oscar Catalan.