P4 mil protection money sa pirated DVD vendors?

Nabaniog karon ang taho may labot sa pagbayad og protection money nga tag P4 mil sa matag sidewalk vendors sa Colon area aron makapaninda kini og mga pirated DVDs, vcd's ug cd's bisan pa man og ilegal ang maong buhat.

Ang consultant sa urban poor sa City Hall Gerry Marquez maoy nakahipos niining maong impormasiyon atol sa gihimong pakisusi niini sa tanang mga sidewalk vendors sa Colon area niadtong miaging Domingo.

Gisusi ni Marquez ang maong lugar human nakadawat siya og report niining nisamot pagdaghan sa mga manindahay og pirated nga mga DVDs, VCD's ug CD's sa maong dapit bisan pa man og kanunay kining gigukod.

Sa nahipos nga impormasiyon ni Marquez dunay usa ka Muslim nga maoy mangimbitar og laing Muslim aron mo-suplay ug mo-display sa mga pirated nga butang diha sa maong lugar bugti sa pagbayad og P4 mil protection money.

Sumala sa nahipos nga kasayuran ni Marquez, ang P2 mil sa maong kantidad mapunta sa maong Muslim nga maoy nagkontrolar sa maong lugar ug ang nahabiling P2 mil mapunta kini ngadto sa giingon nilang sakop sa SPEED isip proteksiyon aron dili kini ma-apektuhan sa demolisyon.

Nagdumili pa sa pagtug-an si Marquez sa ngalan niining maong Muslim nga maoy utok sa maong binuang gumikan kay padayon pa silang nanghipos og mga ebidensya aron pagpalig-on sa maong alegasyon.

Laing vendor nga kaila ni Marquez nga naninda diha sa nasunog nga lugar sa Gazini Plaza ang nagpakisayod kaniya kon tinuoray ba'ng mahatagan sila og proteksiyon kun makahatag sa maong gidemanda nga kantidad gumikan kay gikumbinser usab siya nga motinda og mga pirated nga butang.

Apan iya kining gibadlong hinungdan nga wala mopadayon sa pagpaninda.

Gumikan niini, gitakdang makig-dialogue si Marquez ngadto sa operations officer sa SPEED nga si Frank Gajudo alang sa himuon nilang paglimpyo sa tibuok Colon area batuk ning mga manindahay og pirated cd's ug vcd's nga padayong midagsang sa maong lugar.

Kini maoy usa ka paagi nga nahunahunaan ni Marquez aron ipamatuod nga walay mga opisyal sa City Hall nga nagdawatan og protection money gikan sa mga manindahay og pirated nga butang diha sa Colon area.