Tiyan sa mabdos natapsingan og bala

Usa ka mabdos nga namalit og utanon suwerte kaayo nga natapsingan lang sa bala sa kalibre .45 ang iyang tiyan nga may sulod nga upat ka bulan nga bata atol sa pagpamusil sa merkado publiko sa Lapu-Lapu nga mipatay pa gyud og usa ka lalaki.

Ang namatay sa pagpamusil sa miaging gabii mao si Arnold Plarisa, 33 minyo, taga Salvage, Looc Lapu-Lapu, usa ka tindero og bulad ug usa ka Maryjane Ramos, 20, minyo nga taga New Paradise, Pajo, Lapu-Lapu, upat ka bulan nga mabdos.

Gipasanginlang namusil si Charlito Tabe, hingkod ang panuigon, nagpuyo sa dalan B. Rodriguez, Poblacion, Lapu-Lapu ug bayaw ni Plarisa.

Base sa imbistigasyon ni PO3 Willam Homoc sa kapolisan sa Lapu-Lapu nga samtang nagkalalis ang magbayaw nga si Plarisa ug Tabe gumikan sa puwesto nga ilang ladlaran sa ilang baligyang bulad, si Tabe mibunot sa kalibre .45 nga pistola dayong pusil ngadto kang Plarisa.

Si Plarisa naigo sa iyang walang dughan hinungdan sa pagdala niini ngadto sa Lapu-Lapu District Hospital ug giduso sa Vicente Sotto Memorial Medical Center, apan dead on arrival pag-abot niini sa maong tambalanan.

Atol sa pagpamusil ni Tabe, si Ramos nga namalit og utanon napagan ug naigo diha sa iyang tiyan sa bala gikan sa pistola ni Tabe. Maayo nalang kay tapsing lamang ang igo niini ug luwas na sa kakuyaw nga kahimtang si Ramos ug ang bata sulod sa iyang sabakan.

Padayon pa gihapon karong gipangita sa kapolisan si Tabe human kini misibat human sa insidente.

Matud pa ni PO3 Homoc nga kasong homicide ug frustrated homicide ang ipasakang kaso batok ni Tabe bisan kini nga nagtagotago sa balaod.