24-anyos gibugno dayon gipusil

Anaa karon sa grabeng kahimtang sa usa ka tawo kinsa gibugno sa silingan apan kalit lang nga gipusil niadtong miaging Domingo sa hapon sa Top Hills, Cabancalan, Mandaue.

Ang biktima mao si Rey Hindang, 24 anyos, ulitawo, nagpuyo sa nahisgotang dapit. Ang mga suspetsado mao sila si Joy Ceniza, 33 anyos, ulitawo ug amahan niining si Francisco Ceniza, hingkod ang panuigon ug mga silingan sa biktima.

Si SPO3 Gil Roco, imbestigador sa Presinto 4 nga gikahinabi sa Banat News miingon si Alma Mamaboy, 24 anyos, dalaga nga nagpuyo sa maong dapit nga maoy nakasaksi sa hitabo nagkanayon nga ang biktima ug Joy Ceniza nagkalalis hangtod nga nagbugno.

Dugang pa niya nga taliwala sa nahitabong panagbugno milanog ang tulo ka boto sa armas ug nakita na lamang niining nalup-og ang biktima nga nagkadugo.

Nakabaton og pinusilan sa tuong abaga ug tuong kilid ang biktima ug dali kining gihatod sa Mandaue City Hospital apan gibalhin sa Vicente Sotto Memorial Medical Center sa dakbayan sa Sugbo.

Si SPO3 Roco miingon nga si Francisco maoy nakita ni Mamaboy nga naghupot sa kalibre 45 nga armas ug gipakatahapang maoy nagpusil sa biktima sa wala pa usab maklaro nga hinungdan.

Giklaro niya nga ilang gihimo karon ang dugang pa gayod nga pakisusi aron gayod sa pagsuta kon ang amahan ba gayod ni Joy Ceniza maoy nagpusil niini.