Kahanas sa mga Pinoy sa pinulungang Englis gidayeg

Gidayeg sa mga negosyanteng langyaw ang kahanite sa mga Pilipino sa pagsulti og American-English hinungdan nga nia karon ibundak ang mga negosyanteng call-centers.

Apan alang kang Chris-Mangelson Presidente sa Western Wats Philippines nga anugon kaayo kon dili kini mamintinar sa kagamhanan sa nasud.

Gibatig kahingawa si Mangelson tungod kay ang Pilipinas maoy ikaduhang nasud sa tibuok kalibotan nga lareno kaayo manulti og AE ang mga molupyo niini.

Si Mangelson mianhi sa dakbayan alang sa usa ka dakong panagtagbo sa mga negosyante kansang linya sa pamatigayon nalambigit usab sa mga call centers.

Alang kang Mangelson nga kon mataligam-an sa gobiyerno sa nasud, malagmit malabwan ang Pilipinas sa China, tungod kay sa pagkakaron gipatuman na sa kagamhanan sa maong nasud ang higpit nga pagbaid sa iyang mga molupyo bahin sa pagsulti og Eninglis.

Ang labing gihugopan karon sa mga dagkong negosyo kinsa panginahanglan sa ginatos nga mga empleyado mao ang lalawigan sa Cebu.

Ang mga pamatigayong call centers nagkinahanglan sa mga empleyadong batid sa AE kay ang mga kliyente niini kasagaran tua sa gawas sa nasud.

Hinuon ang maong kahingawa ni Mangelson, daan nang nabantayan sa mga magbabalaod sa nasud.

Dili pa dugay gituki ni Kongresista Eduardo Gullas ang dakong panginahanglan nga mabaid ang mga estudyante nga Pilipino bahin sa hustong pagpanabi og Eninglis.

Kini tungod kay gusto ni Gullas nga ugma damlag labing dili maglisod sa pagpanarbaho ngadto sa gawas o bisan dinhi sa ato ang mga Pilipino.