Tabang sa UV Alumni sa taga Guinsaogon

Nagpadayon karon ang halapad nga kalihukan sa mga kadagkuan sa University of the Visayas sa gilusad niini nga kalihukan nga gitawag og "Bunga sa Gugma" nga gitumong aron pagtabang sa mga tinun-an sa maong unibersidad nga mulopyo sa barangay Guinsaugon sa lungsod sa St. Bernard sa probinsya sa Southern Leyte.

Si Willy Justimbaste, ang tigpamaba sa University of the Visayas Alumni Center miingon nga nalipay sila gumikan kay daghan nga tawag ang ilang nadawat aron pagpaluyo sa maong kalihukan.

Matod pa ni Justimbaste nga ang kalihukan gitumong aron gayud maseguro nga makapadayon sa ilang pagtungha ang walo ka mga tinun-an sa maong unibersidad nga mulopyo sa barangay Guinsaugon.

Nalakip sa mga mipahibawo sa ilang tabang mao sila si Bernardo Abutan, usa ka magpapatigayon sa dakbayan sa Danao ingon man si Liza N Saur nagbase na karon sa Michigan, U.S.A.

Si Abutan migradwar sa UV isip usa ka working student samtang si Saur migradwar usab sa maong tulonghaan.

Matod pa ni Justimbaste nga sila pipila lang sa mipasalig og suporta sa mga tinun-an aron makapadayon sa ilang pagtungha.

Nahimo kining maong proyekto gumikan sa paningkamot ni Dr. Jose Dodong Gullas ang executive vice president sa UV.

Nalakip usab sa mipasalig og tabang si Kongresista Eduardo Gullas pinaagi sa pagpagawas og gahin gikan sa iyang buhatan alang sa walo ka mga tinun-an.

Niadtong tuig 2003 ang kadagkuan sa maong unibersidad milusad usab sa susama nga kalihukan dihang adunay pagdahili sa yuta sa isla sa Panaon sa maong probinsya.

Human ilusad ang maong programa aduna nay mihatag sa ilang donasyon. Naglakip niini si Ms. Lilia Pascual, UV Gullas Law School, UV Compostela branch, elementary og secondary departments sa UV main, Liberal Arts, UV Pardo og UV Mandaue, Teachers College ingon man ang School of Business Administrations. Alang sa gustong modonar mahimong mutawag sa UV Alumni Center sa telepono 254-7604 og 254-0966 or [email protected]