"Overstaying nga mga langyaw sugdan og panakop sa BID-7

Subsub nga kampanya sa BID-7 alang sa mga overstaying nga mga langyaw dinhi sa Sugbu sugdan na karong bulan sa Abril

Kini ang pamahayag ni BID -7 Regional Director Geronimo Rosas atol sa pakighinabi sa Banat News.

Matud pa ni Rosas human niya masayri nga adunay 1, 700 pa sa mga langyaw sa 7 mil ka mga lanyaw nga nia sa Central Visayas ang nagparehistro sa ilang bag-ong gilusad nga I-Card system, daghan pa gihapon ang wa pa makarehistro bisan pa nga duol na ang katapusang hugna karong Abril 15 ning tuiga sa ilang pagparehistro ngadto sa BID-7.

Matud pa ni Rosas nga sukad pa niadtong milabay nga tuig ang ilang pagpahibalo sa mga langyaw nga nia sa Sugbu nagtungha, nagnegosyo ug nagtrabaho human nga gisibog ang tagal sa pagparehistro niadtong Disyembre 31 tuig 2005 ngadto sa Abril 15 ning tuiga sa pagparehistro sa ilang buhatan gamit ang I-Card, apan gamay ra ang misanong sa maong mga langyaw.

Gumikan niini mipasidaan si Dir. Rosas nga mohimo ug subsub nga kampanya sa mga langyaw nga overstaying ug way mga dokumento pinaagi sa iyang mga operatiba sa BID-7 inabagan sa mga sakop sa kapolisan nga iyang i-deputize atol unya sa pagsita sa mga langyaw nga nia dinhi sa Sugbu.

Ang maong lakang matud pa ni Rosas dako kini og ikatabang sa pagsuhid sa mga overstaying ug way mga dokomentong langyaw nga nagtikawtikaw dinhi sa Sugbu ug sa nasud.

Ang I-Card usa ka bag-ong teknolohiya nga gisagop karon sa BID-7 sa daling pagtino sa record sa usa ka langyaw kung wa ba kiniy kalambigitan sa teroristang kalihukan sa ilang nasud, derogatory records o blacklisted sa dapit nga ilang gigikanan.

Kahinumduman nga usa ka langyaw ang mipusil patay ni Dra. Lim Chua sa iyang klinika sa Cebu Doctors Hospital ug naghikog usab diha-diha dayon ang suspetsadong langyaw sa milabay'ng bulan ug nasuta sa BID -7 nga ang maong langyaw overstaying dinhi sa nasud.