2011 ang target sa drug-free nga Mandaue

Gitinguha sa kagamhanan sa dakbayan sa Mandaue nga mahimong drug-free sa tuig 2011.

Kini bisan gibutyag sa consultant on substance abuse prevention and detection, Retired Chief Supt. Patricio Barz, Jr. nga nagpadayon ang kalihukan sa ilegal nga drugas sa siyudad gikan sa mga ekslusibong subdivisions nga gipuy-an sa mga adunahan ngadto na sa masa nga namuyo sa mga hilit nga lugar.

Atol sa niaging sesyon sa konseho sa syudad sa Mandaue, gipresentar ni Barz ang action plan alang sa tuig 2006 tumong sa pagsanta sa ilegal nga drugas sa syudad.

Ang Total Enforcement of the Dangerous Drugs Laws (TEDD) Board maoy ahensiya sa lokal nga kagamhanan nga gitahasan sa pagpatuman sa maong action plan sa pagpakig-alayon usab sa ubang ahensiya sa kagamhanan sama sa DILG, barangay anti-drug abuse council, kapolisan, Philippine Drug Enforcement Agency, piskaliya, korte, Dangerous Drugs Board, DSWD, Parole and Probation, DOLE, DepEd DOH ug Public Information Office.

Gipadayag ni Barz nga dili lang ang syudad sa Mandaue ang nag-antus sa maong problema sa ilegal nga drugas.

Nanawagan si Barz sa Mandauehanon nga maghiusa sa pagpakigbatok sa ilegal nga drugas aron makab-ot ang tinguha nga mahimong drug-free sa tuig 2011.

Ang TEDD Board gimugna niadtong Pebrero 25, 1999 ubos sa usa ka ordinansa.

Si Barz niduso og mga kausaban sa maong ordinansa ngadto sa konseho sa syudad aron mas epektibo pa gyud ang gimbuhaton niini.