Giluba-patay sa gisagpa

Usa ka lalaki nga nanagpa atol sa birthday party gidunggab hinuon sa iyang gisagpa.

Ang napatay nailhang usa ka Allan Bertulfo, hingkod ug minyo nga taga barangay Opao, dakbayan sa Mandaue.

Si Bertulfo mitambong sa birthday party sa iyang ig-agaw niadtong Domingo, alas 3 pasado sa hapon sa barangay Calambua, lungsod sa San Remegio.

Base sa imbestigasyon sa kapolisan nga nanagpa duha ka higayun si Bertulfo nga walay igong hinungdan ngadto sa usa ka Teofisto Ochea, 55 anyos, minyo nga taga Gimpilacan, Kantubaon, Tabuelan kinsa diha atol sa birthday party.

Mosagpa pa gyud unta sa ikatulong higayun si Bertulfo apan wala na kaagwanta si Ochea, mikuha na kini og mahait nga hinagiban dayon dunggab ngadto sa biktima.

Ang biktima nakaangkon og samad dinunggaban sa may tuong bahin sa iyang dughan hinungdan sa iyang hinanaling kamatayon.

Ang suspek mitahan sa iyang kaugalingon sa barangay kapitan sa Calambua, lungsod sa San Remegio una pa gitugyan ngadto sa nirespondeng kapolisan.