Tunga sa milyon nadala sa 6 tulisan

Dul-an sa tunga sa milyon ang nasakiyo sa unom ka mga gidudahang tulisan diin tulo lang kanila ang misulod diha sa usa ka travel and tours agency ug money changer sa dalan Gorordo ning dakbayan kagahapon sa udto.

Wala kaugpo ang mga kawani sa Cinderella Travel Agency and Money Changer human kalit nga gipangtiunan og armas de fuego sa tulo ka mga suspek nga armado og kalibre .45 pistola.

Sumala pa ni Marlene Ayanggod, usa sa mga kawani sa pakighinabi sa mga tigbalita nga tulo ka tawo ang kalit nga misulod ug mipahapa kanila samtang sila gipangtiunan og armas.

Sayo pa niana gikatahong usa ka wala mailhing lalaki ang nagpakaaron-ingnong kustomer ang nagpailis og dolyar, human mipailis misaad kining mobalik dala na ang kaubang mopailis usab og mas daghang dolyares.

Dangtan og pila ka gutlo mibalik ang maong lalaki dala ang mga kauban apan kalit silang gitulis sa grupo diin pugsanong gikuha ang ilang 68 ka mga dolyares nga balor og P350, 000 ug P68, 000 nga salaping Pilipinhon.

Gawas pa niini ang wala matinong kantidad sa mga ginagmay'ng mga kwartang dolyares nga wala maapil pag-ihap apan nadala sa mga tulisan.

Ang ig-agaw sa tag-iya nga si Rosemarie Abueva mao nay mipindot sa ilang burglar alarm aron pagpahibalo sa kapolisan nga sila gitulis.

Si konsehal Sylvan 'Jack' Jakosalem kinsa daling misusi sa gikahitaboan sa pakighinabi sa mga sakop sa media nagkanayon nga dako iyang pagtuong mao rang grupoha ang mitulis sa usa ka money changer sa Mabolo usa na ka semana ang nakalabay.

Nasuta nga walay gwardiya ang maong establisamento nga gihulagway nga duna gyuy lapso sa seguridad hinungdan sa insidente. Giingong gawas sa tulo ka mga suspek nga maoy misulod duna pay laing tulo nga nagpaabot diha sa gawas luwan usab og laing motorsiklo.

Ang Theft and Robbery Section kasamtangan pang nagpadayon sa imbestigasyon kabahin sa maong kaso aron pag-ila sa mga suspek.