2 ka lalaki gikan nag-vigil gipusil

Duha ka mga lalaki nga gikan pa mitambong og vigil sa patay gibanhigan usab sa wala mailhing mga batan-on, usa sa mga biktima gitangkugo og pusil samtang ang usa nadughan ug kritikal nga nadangat sa tambalanan niadtong nakalabay'ng gabii.

Patay ang biktimang si Rafael Quibuen, 21, gumikan sa usa ka bala diha sa iyang tangkugo samtang talandugon nga nadangat sa Vicente Sotto Memorial Medical Center ang kauban niining si Joel Cortez, 28, minyo, pulos mga molupyo sa Nasipit Road, Talamban.

Base sa gihimong imbestigasyon ni SPO1 Jay Yballe sa Crime Against Person Section (kanhi Homicide Section) sa Cebu City Police Office ang duha kasamtangang naglakaw diha sa Nasipit, Talamban dihang kalit nga gibabagan sa mga suspek.

Sa wala pa matinong hinungdan gikatahong dunay nahitabong panaglalis tali sa mga biktima ug mga suspek nga misangpot sa pagbunot sa suspek og armas ug gipamusil ang mga biktima.

Gidudahang ang mga suspek mga tinun-an sa usa ka tunghaan diha sa nahisgutang lugar apan wala pa matino ang motibo sa pagpatay.