Babayeng pusher naka-eskapo

Napakyas ang kapolisan sa San Remegio sa pagsikop sa usa ka babayeng drug pusher kinsa gikatahong nalakip sa watchlist tungod kay wala kini diha sa iyang balay atol sa gipahigayong pagpangronda sa mga awtoridad niadtong Biyernes sa gabii diha sa Hagnaya, San Remegio.

Nakaikyas sa mga awtoridad si Anita Bataclan ayas "Monik" hingkod ang panuigon residente sa maong lugar.

Matud ni PO2 Joe Johnnesky Ynot, polis sa San Remegio nga wala diha sa balay niini si Bataclan atol sa gipahigayong pagpangronda sa iyang mga kauban.

Ang maong pagpangronda gipangulohan ni Police Senior Inspector Laurel Almirante, hepe sa kapolisan sa maong lungsod.

Dala sa mga polis sa ilang pagpangronda ang search warrant nga giluwatan ni Bogo RTC Judge Antonio Marigomen.

Nasakmit sa mga polis gikan sa balay ni Bataclan ang duha ka paketeng shabu, shabu paraphernalia, P7,700 nga salapi nga gituohang halin sa ginadiling drugas, tulo ka sing-sing ug ariyos.

Ang nahisgutang mga alahas lakip sa nahisgutan usab nga salapi diha sulod sa usa ka puti nga envelop.

Si Ynot nagkanayon nga giandam na sa iyang mga kauban ang kaso nga ipasaka batok ni Bataclan.