Drag racer arestado kay misuway'g dasmag sa mga polis sa SRP

Nagtingkagol ang usa ka 25-anyos nga lalaki human kini midasmag sa sakyanan sa polis nga miresponde dihang nagpahigayon sila og drag race uban sa laing tulo ka lalaki diha sa Cebu South Reclamation Road (CSRR) habig sa Talisay kagahapon sa kaadlawon.

Ang tulo ka kauban sa suspetsado kinsa wala malakip sa blotter ang mga pangalan giisyuhan og Temporary Operator's permit (TOP).

Si Rex Cañada residente sa Barangay Mohon gisikop nila ni SPO3 Romeo Hurboda ug PO3 Rico Emperwa alert team sa kapolisan sa Talisay tungod kay mibangga kini sa mobile 6 sa polis gani giingong buot unta niining banggaan si Hurboda.

Si SPO3 Noel Factores desk officer sa kapolisan sa Talisay nagkanayon kagahapon sa Banat News nga ang grupo sa traffic division nangayo og ayuda sa alert team para sa pagsikop sa nahisgutang nag drag race diha sa lugar.

Si Cañada buot untang moikyas dihang gisita kini sa mga polis apan nabangga ang motorsiklo niini sa sakyanan sa polis og maayong pagkatuwad niini diha sa karsada og nakaangkon og mga bun-og sa iyang paa.

Matud ni Factores nga daling mibarog si Cañada gikan sa pagkatumba niini og arogante kaayong nakigtinubagay sa mga polis dayon paandar og balik sa iyang motorsiklo og buot untang banggaan si Hurboda apan nasignit kini ni Emperwa ug gitanggong sa prisohan.

Ang motorsiklo ni Cañada nga XRM kolor blue nga nagtangag sa plakang YI-5265 gi-impound sa mga polis.