Rambol sa BBRC duha naangol

Duha ka mga bilanggo sa Bagong Buhay Rehabilitation Center ang nangalandig sa Cebu City Medical Center human mahitabo ang karambola sa mga priso diha sa maong prisuhan sa miaging gabii gumikan lang sa pag-overtake sa usa kanila sa linya sa rasyon.

Sa mga naangol nagrabehan mao si Julius Flores, taga dalan Martirez ning dakbayan kinsa nadunggaban diha sa iyang buko-buko ug nabunalan diha sa ulo nga nakaingon usab sa pagkagisi niini.

Samtang nabun-og mao si Laureto Padilla, 30 taga Sitio Bato barangay Ermita ning dakbayan kinsa uban sa mga kaubanan sa brigada 4 maoy miparegla kang Flores.

Matud pa ni Chief Inspector Efren Nemeño ang warden sa BBRC sa pakighinabi sa Banat News nga nahitabo ang panagbingkil atol sa pagpangaon sa mga priso.

Usa ka Anthony Cancio nga taga kitchen ang mipalag dihang misapaw sa linya si Padilla nga miresulta sa mainitong panaglalis hangtud nga nanawag si Padilla og kauban hinungdan sa nahitabong karambola diin si Padilla nahapsan gyud sa mga taga kusina.

Dangtan pila ka gutlo si Flores kinsa padulong na sa iyang selda sa brigada 5 naalaan sa grupo ni Padilla nga taga kitchen ug kalit nila kining gitabangag kulata, usa sa mga kauban ni Padilla nga si Ginos Ando maoy gitumbok nga midunggab kang Flores sa buko-buko gamit ang usa ka improvised nga kutsilyo.

Daling gidala ang biktima sa Cebu City Medical Center alang sa pagpatambal samtang gibutyag ni Nemeño nga dili interesado si Flores sa pagpasaka og kaso batok kang Padilla sanglit nahusay ra kini diha sa sulod.