Mga mag-uuma kinaraan ra gihapon og paagi

Giwitikan og mga saway ang mga mag-uuma kinsa kinaraan lang gihapon og pamaagi sa pagpanguma.

Matud pa ni Regional Director Eduardo Lecciones sa Department of Agriculture (DA-7) nga kining kinaraan angay nang isalikway kay minus kaayo og produksyon ang maong pamaagi.

Gitumbok ni Lecciones ang mga modernong pamaagi sa panguma og humay, mais ug uban pang mga tanon uban sa mga bag-ong teknolohiya sa panguma.

Kini maoy angayang sagupon karong panahona aron mahitukma sa panginahanglan sa nagtubo nga gidaghanon sa katawhan sa nasud.

Gihisgotan ni Lecciones ang awhag ni DA Secretary Domingo Panganiban kinsa mipahimangno sa mga mag-uuma nga dili na karon mosaler ang kinaraang paagi.

Daghan kaayong programa ang gobiyerno alang sa modernong pamaagi sa pagpanguma og humay, mais, mahalong utanon ug prutas ug uban pa nga alang sa pagpalambo sa produksyon sa agrikultura sa nasud.

Gumikan niini gipalihok ni Panganiban ang tanang opisyal sa DA sa nasud aron subayon ang mga nakat-onan sa mag-uuma bahin sa panguma.

Kun ugaling kinaraan na kaayo ang ilang estelo, kinahanglang tudloan sila sa binag-ong estratihiya aron molambo pag-ayo ang mga produkto sa kaumahan ilabi na sa pagkaon.

Matud pa ni Lecciones nga ang kamandoan ni Panganiban gipadangat na ngadto sa tanang mga Regional Field Units sa DA aron makaabot ngadto sa mga mag-uuma.

Dinhi sa Cebu daghan kaayo og mga programa ang DA nga gipaagi sa radyo sama sa "shool on the air" nga gipalanog sa DYMR radyo ng Bayan Cebu nga gisabak ubos sa tulomanon "Masaarong Adlaw."

Sa maong tulomanon matag buntag gikan sa Lunes hangtod Sabado gibaid ang pangutok sa mga mag-uuma sa hustong paagi sa pag-abuno sa humay, mais, prutas ug utanon ug ang pag-atiman og kahayopan.